א הארעלע

א הערעלע געדרייט

צווישן פינגער פארכאפט

כאילו זי פארשטייט

נישט וואס קלאפט

אין סברא פארקנייטשט

פארוויקלט, פארקלערט

אין דילעמא פארקניפט

קרייזעלעך זי ווערט

א שנירעלע ווייסע

אין צירקלען גייט

פארציילט זי א מעשה

לאנג און געדרייט

מיט צוואנג אפגעפליקט

פון שורש ווילד

גענצליך אן וויסן

איר חלק אינעם בילד

געפעלט האט א האר

צי ערגענצן די סברא

געפאלן איז אין פלאץ -

זי אין די גמרא.

זי און די גמרא.